بیروڕا

محەمەد مورسی بژاردەی هەرە پەسەندكراوی ئیخوان موسلیمین نەبوو

محەمەد مورسی بژاردەی هەرە پەسەندكراوی ئیخوان موسلیمین نەبوو بۆ سەرۆكایەتی كۆماری میسر، بەڵكە كاتێك بە تانەی یاسایی دۆسیەی خیرەت شاطری سەركردەی دیاری ئەم كۆمەڵە ڕەتكرایەوە، بەناچاری ئەم لە كورسی یەدەگەوە دابەزییە ناو گۆڕەپانی كێبەركێ گەورەكەی سەرۆكایەتی (٢٠١٢).

لە ماوەی ئەو كەمتر لە ساڵەی حوكمڕان بوو، محەمەد مورسی زیاتر پشتی بەشەرعیەتی ئەو ٥١% دەنگە بەستبوو كە زۆرتر ئیسلامییەكان و خەڵكی شۆڕشگێڕ و هەژاری میسر پێیان بەخشیبوو، بەڵام ئەو ٤٩% كە مابوون و نەیاری بوون زیاتر بریتی بوون لە: پلەدارەكانی سوپا، دەزگا هەواڵگرییەكان، ئەمنی دەولە، وەزارەتی ناوخۆ، دەوڵەتی قووڵی موبارەك لەگەڵ زۆرێك لە هێزە چەپ و عەلمانی و مەسیحییەكان ئەمە جگە لە هونەرمەند و بزنسمانەكان، ئەمانە زۆر بەئاسانی لە 2013 بەهاوكاریی وڵاتانی كەنداو و تیشكی سەوزی ئەمەریكا و ئەوروپا “مورسی” یان لە كۆشكی “الاتحادية” وە نارد بۆ زیندانی “برج العرب” لە نزیك ئەسكەندەرییە و بەئامادەیی پاپا تواضرسى قیبتی و ئیمامی ئەزهەر ئەحمەد تەیب و حیزبی نور جاڕی سەردەمێكی نوێیان دا (٣٠ یونیو ٢٠١٣).

ئاسایشی میسر پەیوەستە بە ئاسایشی ئیسرائیل و سعودیەو لەڕۆخی دەریای ناوەڕاستە كە وڵاتانی ئەوروپاو باكوری ئەفەریقا پێكەوە گرێ دەدات، جگە لەوەش خاڵی بەیەكگەیشتنی سێ كیشوەرە و نۆكەندی سوێس لە خۆ دەگرێت و بەدڵی جیهانی عەرەبی دادەنرێت و كرانەوەو هونەر و گەشتیاری تێیدا بەهێزە، هەموو ئەم تایبەتمەندیانەش ئەوەیان لێكەوتەوە كە سوپا دەستی واڵا بوو شۆخێكی توند لەدیموكراسیەت و شەرعیەتی دەستوری بدات و عەسكەر بكاتە فرمانڕەوای ڕەهای وڵات.

زۆرێك لەو پێداچونەوانەی بەم دواییە كراون باس لەوە دەكەن ركابەریی ئیخوان لەسەر سەرۆكایەتی میسر هەڵەی كوشندەو گەورە بووەو دەبوایە لە پێگەو ئاستەكانی خوارەوەدا بمانایەتەوە بۆ ئەوەی نەبنە نێچر و ئامانج، بەڵام هەموو بارودۆخێك ئەحكام و پاساوی خۆی هەیەو تازە ئەوەی ڕۆشت ناگەڕێتەوە بۆ دوا، ئێستاش لە هەمووی سەیرتر و پێكەنیناوی و شۆكهێنەرتر لەهەمان كاتدا، مامەڵەی میدیای فەرمی و نافەرمی میسرییە لەگەڵ مردنی مورسی كە ناڵێن سەرۆكی پێشوو لەكاتێكدا یەكەم سەرۆكی عەرەبییە كە بەهەڵبژاردن پۆستەكەی وەرگرتبێت و پێنجەم سەرۆكی ئەو وڵاتەیە لە دەورانی كۆماریدا.

ڕۆژنامەنووس: یاسین تەها

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Close